தஞ்சாவூர் அருகே மேலகளக்குடியை சேர்ந்த முன்னாள் ஊராட்சி மன்ற தலைவர் புண்ணியமூர்த்தியின் மகள் காவியா (26), ஆலங்குடி அரசு தொடக்கப்பள்ளியில் தற்காலிக ஆசிரியராக பணியாற்றி வந்தார். அதே ஊரை சேர்ந்த அஜித்குமார் (29) பெயின்டராக வேலை பார்த்துவரும் இவர், காவியாவுடன் சுமார் 13 ஆண்டுகளாக காதலில் இருந்ததாக கூறப்படுகிறது.
இருவரும் ஒரே ஜாதியை சேர்ந்தவர்கள் என்றாலும், காவியாவுக்கு அஜித்குமாரை திருமணம் செய்து வைக்க அவரது பெற்றோருக்கு விருப்பம் இல்லாததால், உறவினர் இளைஞருடன் திருமணம் செய்து வைக்க கடந்த நவம்பர் 23ம் தேதி நிச்சயதார்த்தம் நடத்தியுள்ளனர். இந்த நிச்சயதார்த்த விபரத்தை காவியா, அஜித்குமாரிடம் மறைத்து வைத்து வழக்கம்போல பேசிவந்ததாக தெரிகிறது.
இதையடுத்து, இரண்டு நாட்களுக்கு முன் இரவு, தனது நிச்சயதார்த்தம் நடந்த விபரத்தையும் புகைப்படங்களையும் அஜித்குமாருக்கு காவியா அனுப்பியதாக கூறப்படுகிறது. இதனால் ஆத்திரமடைந்த அஜித்குமார், நேற்று காலை பள்ளிக்கு ஸ்கூட்டியில் சென்ற காவியாவை கொத்தட்டை காலனி பகுதியில் வழிமறித்து, “நிச்சயதார்த்தம் ஆனதை ஏன் கூறவில்லை?” எனக் கேட்டு தகராறில் ஈடுபட்டார்.
வாக்குவாதம் தீவிரமான நிலையில், அஜித்குமார் அரிவாளால் காவியாவின் தலையில் பலத்த குத்து காயம் ஏற்படுத்தியதால், அவர் சம்பவ இடத்திலேயே உயிரிழந்தார். சம்பவத்துக்குப் பின்னர் அம்மாபேட்டை போலீஸ் ஸ்டேஷனில் சரணடைந்த அஜித்குமாரை போலீசார் கைது செய்து விசாரணை நடத்தி வருகின்றனர்.
